松家日本料理 (已結業)

同事生日，大伙兒一齊去食餐晏，撰這店原因是夠近夠方便，之前食過也可以。今次個人點了壽司油甘、吞拿、希靈和加州卷，再加上雜錦天婦羅及叉燒拉麵。基本上在中區食晏，不在相熟的食肆，就不能要求太高，人人都趕時間返工，食肆也要遷就我們一眾打工仔，盡快上菜，變成大部份都是預制食品或半制成品，到上檯時就打仗一樣，總之你叫咗嘅嘢，上得就即上，最緊要快。今次也不例外，我叫的三樣嘢最先到的竟是叉燒拉麵，叉燒夠入味，拉麵入口也不太淋，湯底不算咸，普通要求的話，絕對可收貨。未食完個麵壽司已已補上，聽講這店晚上做放題，可能是這原因，入貨就比較普通，油甘魚味很淡，吞拿也不覺鮮，希靈也失去應有的甜，加州卷表面的蟹子有如地震後殘留般希疏，但整體上四件壽司比百佳超市的好，中午比咁嘅價錢，D嘢叫做放得入口，勉強也過關了。但食完麵同壽司之後就停咗五分鐘，催咗兩次才見到個雜錦天婦羅已送上，天婦羅是剛剛炸起，炸粉厚薄合適，夠香口又夠脆，但用料一般，番薯幾香，蝦也彈牙，但茄子無味，南瓜太淋，原本此菜算幾好，始終是即做嘛，但可惜嗰汁就似豉油開水，味道有點怪之餘又無蘿蔔蓉，變相失色不少。對我來說，食餐晏無乜所謂喇，晚餐？可免則免了！