School Food (已結業)

等閒日帶肥髀去School Food食晚飯，知道呢間都係人龍店，早啲6點幾到，唔使等就入場！ 坐靠牆2人位，環境比九龍灣暗啲，裝修都以色彩繽紛傢俬！簡潔乾淨，今次同肥髀來，本來可以試多幾樣食物，但肥髀又有自己主意，最後只係試到一樣自己想試嘅！炸蝦卷--即叫即製，堆成兩小堆，炸起嘅蝦仲係好油，食落好膩，又無蔬菜中和，一般！卡邦尼年榚--年榚煙韌，白汁好滑香濃，好重忌廉味，煙肉淋身唔乾，咸咸香香，仲有爽脆洋蔥！好味！水冷麵--我同肥髀都鍾意食日式冷麵，韓式第一次食，個碗好大，麵一團，上面有少許酸蘿蔔片，青瓜絲，同半隻烚蛋，湯內浮住好多冰碎，所以極凍，店員問我使唔使剪開團麵，我話唔使，原來團麵都好長，不過都叫分得開，麵質幼身煙韌，無因為浸湯而發大，但個湯好淡，真係有水浸麵嘅感覺，味道全靠幾片酸蘿蔔，青瓜爽脆，烚蛋連蛋黃都煮到熟透，無味！店員勤快，又有禮，肥髀唔小心打瀉水，極速有人拖地收拾！辛苦了！勁𤓓 不過張枱就細啲，唔係太夠位放食物，店員收拾都好勤！