鳳城酒家 (已結業)

在金都Quick scan一輪,也有不錯的收鑊(唔係我).下一步,當然要搵地方晚飯,身處太子吃中菜,鳳城可以話係鐵膽,其他的只能做配腳.起碼對我而言,一超過三個人,要在太子吃中菜,一定會係鳳城,人地問到,我都會比呢個標準答案.最重要係,位置在正金都隔離,近地鐵站,合晒大小姐要求,又唔使老人家行多兩步.呢個安排,對方當然沒有反駁之餘地.周六夜人頭擁擁,幸好之前上來留左位.否則真係有排等.綜合兩母女的口味之後,再係咁意瞄一瞄菜單,三個人,四味搞掂.吃多味都吃力.炸子雞半隻,吃過咁多次,依舊出色.炸子雞係貴店之名菜.雞用鮮雞,肉質嫩滑有雞味.外皮炸得香脆,皮同肉之間的脂肪,對一個愛肥雞的人來講,吃得滿心歡喜.上湯炸粉果半打,粉果皮炸得鬆化,一放湯,五秒之內,在沙沙聲之間,已經極速變淋,個人都係愛吃未放湯的炸粉果多一點.老人家唔吃得蝦,窩貼大明蝦無得諗,要個桂花炒魚肚算數,魚肚很爽脆不過淋,有瑤柱,芽菜,蛋絲,火腿,夠大堆頭,蟹肉扒芥菜膽.蟹肉即拆,啖啖肉很新鮮,菜膽唔苦無渣.很清甜.個人覺得水準依舊,但兩母女異口同聲覺得菜式味道偏咸.服務麻麻,一向如是,大小姐唔同我,對服務,還是有點要求的.