影片
更多
2014-09-03
4501 瀏覽
家中嫲嫲年過九十，身體一向強健，但自從大前年輕微中風後，進食時總覺得吞嚥吃力 ，早、午、晚三餐都已改食蛋、豆腐、較易咀嚼o既生果及流質食物為主。蛋糕方面，嫲嫲只愛吃Cova出品o既Mango Dome，大讚糕身軟滑，味道香甜，而且易入口，故此每逢有親喜慶事，我地都必定會以此款Mango Dome作甜品。可惜天意弄人，嫲嫲最近開始對芒果敏感，每次食完芒果，例必全身痕癢紅腫 ，醫生隨即勒令要停止食用任何有芒果成份o既食品！打從醫生禁止嫲嫲食芒果以後，乖孫小肥就開始四周覓尋啱嫲嫲食o既蛋糕。記得個多月前於舅父壽宴食過「2/3 Dolci」o既Amore蛋糕，質感濕潤且軟綿綿，相信嫲嫲應該食得到，但因Amore蛋糕主材為荔枝，另一種容易引起過敏反應o既生果，細佬最終決定喺店舖內揀選另一款蛋糕，為八月份其中兩位壽星仔女慶生。「2/3 Dolci」位於灣仔間分店，附近除咗有地鐡站、巴士站、電車站、的士站、小巴站之外，最重要係周遭唔係寫字樓，就係餐廳同住宅，客人攞返公司、餐廳、屋企食都同樣咁方便。餅店細細間，光猛企理，而且冷氣足，擺放著各款蛋糕o既玻璃陳列雪櫃望落都好乾淨衛生，成功贏取滿分環境分
「2/3 Dolci」位於灣仔間分店，附近除咗有地鐡站、巴士站、電車站、的士站、小巴站之外，最重要係周遭唔係寫字樓，就係餐廳同住宅，客人攞返公司、餐廳、屋企食都同樣咁方便。餅店細細間，光猛企理，而且冷氣足，擺放著各款蛋糕o既玻璃陳列雪櫃望落都好乾淨衛生，成功贏取滿分環境分 。
小肥做事頗有計劃，訂蛋糕都一樣，會先搜集好資料先行入間餅舖度落order。雖然XO仔喺網上已鎖好目標，知道自己想訂咩款式o既蛋糕，但為咗要測試服務生o既態度及專業水平，小弟行入舖頭後，故意假裝對店內之糕點不太認識，要求姐姐仔介紹幾款人氣蛋糕 。當時店內有兩位姐姐仔，一位正在忙碌包裝，另外一位則續一為XO仔略作簡介，初時感覺都幾專業架，但係當問到第三款蛋糕時，接緊盒嗰位姐姐仔就開始插嘴，話佢地所提供o既產品非常獨特，喺各方面同其他西餅店內o既都好唔同，表情更有不耐煩之嫌 ！小肥就好有禮貌咁同兩位解釋話自己其實係好有誠意黎訂蛋糕，只不過因家中長輩咀嚼能力有所限制，所以想清楚了解成份及蛋糕質感先決定訂購邊一款。講真，每一個行入「2/3 Dolci」舖內o既朋友其實唔一定要幫襯，問吓食材、製法、價錢等資訊都好平常，如果唔啱係絕對可以選擇唔買野就走！「包裝姐姐」友善欠奉，其同事再專業都好難彌補小弟所感到之不快，故此餅店之服務分只能與其店名比齊，只剩三分二 ！
二十多年前，大肥爸爸同靚靚媽咪曾經帶同公公婆婆、爺爺嫲嫲，三代同堂暢遊夏威夷，當時最令XO仔印象深刻o既就係飲石榴汁。小肥同哥哥喺香港從未飲過石榴汁，喺夏威夷初嚐已深深愛上其鮮甜o既味道，我地一家八口每日最少飲用三大盒 ，旁人都大叫誇張！嘻嘻，不過最搞笑o既莫過於滿腔口音o既婆婆，每朝起牀第一句就話要飲「蛇尿汁」，而大肥爸爸則同時取笑細佬唔純正o既英語，不斷重複「瓜瓜juice」，「瓜瓜juice」（石榴汁英語為Guava Juice），直至我地旅遊後返香港大家都仲喺度笑緊 。今次可能係機緣巧合，XO仔喺「2/3 Dolci」個網站度見到佢地一款以石榴作主材o既蛋糕，詳閱過簡介，再打電話到餅舖了解清楚，覺得會啱嫲嫲口味，所以就決定生日會訂購此味Guaiava蛋糕。
Guaiava（$420/一磅）：Guaiava外觀同其主材之石榴果肉一樣為火紅色，鮮艷奪目！多層o既海綿蛋糕以石榴果醬、mousse、及啫喱層分隔開，口感豐富得黎仍能保持軟熟濕潤，石榴味道清幽香甜，絕無過火，我地年輕一輩都非常欣賞 ！每磅蛋糕為$420一啲都唔平，不過考慮到千層蛋糕功夫多，用料新鮮上盛，其實都好抵架啦！可惜嫲嫲卻嫌海綿蛋糕層偏乾，食咗兩口就放棄；小弟愚見，如果師傅將其中一層海綿蛋糕改為石榴忌廉，唔知會唔會增加整體之濕滑感，令嫲嫲覺得較容易入口呢？！
雖然今次喺「2/3 Dolci」所選購o既蛋糕未能滿足嫲嫲要求，但壽星仔女都極為滿意，仲大讚蛋糕質高美味，更評論最少值八十五至九十分添 ！小肥個人對「2/3 Dolci」餅店o既地點、環境、衛生都給予滿分，對其出產o既糕點亦有頗高o既評價，唯獨因受到臨場服務生不太友善o既口吻所影響，所以對是否再次幫襯而有所保留。
張貼
