神屋流博多道場 (已結業)

博多道場一直是自己在銅鑼灣的首選，野食豐富，價錢合理，環境幽靜。可能是個裝修同位置，除左一般熟客，其他人可能以為是間貴價餐廳。我平日同週末都有來過，一般都可以直接walk in，無需等候。一排無來，今日晚市來到，見到餐牌都更新左，加左新菜式，不過其實有D經典的只是稍加改名。好彩我之前的至愛海鮮蘿蔔沙律都仲有。蘿蔔非常爽脆，加上新鮮海鮮同番茄的配搭恰到好處，加少少酸醋汁，一大淡食落去，非常享受。魚生飯無太特別，夠新鮮夠大塊，自己覺得ok，不過食開壽司的朋友就肯定唔多滿意。 牛肉餅是今晚的亮點。肉質鬆軟，食到有落少少酒，攪勻個雞蛋，好滑好香口，餸飯一流。跟住就是鎮店之寶，相撲鍋。食材新鮮，分量十足，有魚、豆腐、豆卜、娃娃菜等，仲有一管竹筒肉。感覺同關東煮差唔多，但是清淡好多，個人亦不喜歡夏天食太濃郁的食物，所以非常稱心。當然，食完仲可以要杯清酒，同老友把酒言歡，隔離的一批日本人亦都鬆tie捲袖、面泛紅光。雖然地方唔大，但如果細心品味，真的感覺不錯。