上海婆婆 (已結業)

放工後今日同事想食上海野，我就提議不如食上海婆婆，因為我上次經過綠楊坊知道嗰度有一間，我哋就決定試一試！我哋到餐廳係七點幾，都算好多人，等左一陣好快就入得去。餐牌種類都算係多，冷盤、主食、麵食、小食同甜品都齊。我地點左一個冷盤四小拼同兩個主菜。食上海菜點可以唔食冷盤啊？四小拼係肴肉、熏魚、烤夫同小排骨，擺盤好靚好吸引，如果兩個人食，份量都有啲多。肴肉即係水晶肉，係用富有膠質嘅豬手或豬腳再加豬肉煮成，放入雪櫃等佢凝結，再切出嚟，就成一塊塊既肴肉，好似凍肉啫喱咁，唔會覺得肥膩，都幾特別！熏魚既醬汁酸酸甜甜咁，都幾開胃，但個人不太喜歡食魚。烤夫同小排骨都煮得好入味，最鍾意食烤夫，因為索晒啲汁好野味，成個拼盤由賣相到食物都唔錯！👍👍講下兩個主食，一個係鱔糊炒年糕一個係糖醋魚塊，兩個份量都好足，食得我哋好滿足！鱔糊炒年糕炒得好夠香，鱔糊亦夠多，個人認為可以多一啲醬汁，可能為咗符合香港人嘅口味健康啲！糖醋魚塊啖啖肉，醬汁酸甜度都啱啱好，加上洋蔥、菠蘿同青椒紅椒，好開胃，可以餸兩碗白飯，只可惜食唔落，哈哈！餐廳整體感覺都好好，侍應殷勤，座位都算闊落，下次可以叫埋其他同事一齊試！😋😋😋