上海廳 (已結業)

今日放假，好懶洋洋，同屋企人落樓下食午餐，呢間上海廳開左一段時間，都未食過添。餐廳坐位幾舒適，但稍為有點焗，好似無開冷氣咁，午餐有飯有湯加$5有豆漿，幾抵食。午餐 銀芽鱔糊$65 +$5豆漿豆漿只有凍無熱，如果可以花啲時間幫客人加熱就更貼心，豆漿質感幾濃厚。例湯係青紅蘿蔔豬骨，幾清甜，肉煲到淋晒，又好足料。主菜銀芽鱔糊味道好濃郁，醬油味中帶甜，最鍾意大量芽菜，好爽甜，鱔已處理好無骨，細細件好易食，撈飯一流！金湯雜菌煮津白$68: 估唔到咁大碟呀，津白煮到清甜，菇菌有幾款，用料豐富，加埋咸蛋黃做調味幾驚喜，清得黎唔會淡，好甘香，個湯都可以飲埋。上海小籠包$36: 個皮薄薄的，底下墊了一塊好薄的瓜片，防拎起黎痴底漏汁，好細心，點少少醋食，咬開黎啜汁，味道好鮮，肉質細緻好鮮，不過就唔太keep到熱度，要盡快食。酸辣湯雲吞$52: 酸辣湯好杰身，味道幾辣又有酸，有筍絲木耳絲好有口感，雲吞勁大粒有五粒，餡料肉多過菜，啖啖肉香呢，皮都係好薄。服務方面算唔錯，會收埋野加茶，人手幾足。