醋娘子 (已結業)

今日同老婆同埋兩位朋友黎到上環永樂街搵嘢食，轉到一間招牌幾得意嘅醋娘子，咁岩我地四個都食得辣野，就決定入去試吓。我哋叫左幾樣小菜。首先嚟到嘅係蒜泥白肉，豬肉上面鋪滿蒜蓉，食落好香好夠味，肉質亦都煮得啱啱好，感覺上比譚仔既好食。小籠包係like左facebook專頁送既，入面有湯，但皮略嫌厚，可作改善。辣子雞係我地幾位嘅最愛，一擺低已經聞到佢嘅香味，香道隔離枱都忙買過嚟。雞塊大小適中，好過出面一啲上海舖頭會比好細快塊既雞粒，味道香口得來唔會太辣，好適合送飯食。因為太入味嘅緣故，我哋最後連啲芹菜都食埋^_^手撕包菜整體合格，若果少啲油少啲辣椒可能會更好。主菜方面有回鍋肉炒年糕，好足料好大碟，幾個人share就岩曬，炒出來好夠鑊氣，年糕有咬口，罕有地比出面嘅餐廳酒樓整得更好食。另外仲叫咗酸辣粉同陽春麵，兩碗麵都不過不失，同出面食到嘅差唔多，應該都係供應商預先預備好材料直接入貨煮成。最後埋單三百零蚊，冇加一，喺上環黎講算幾抵，鋪面感覺乾淨乾淨，服務態度都唔錯，將來經過永樂街應該會再嚟。