我愛慢煮 (普慶坊) (已結業)

今晚約咗朋友聚舊，揀咗係上環普慶坊嘅呢間我愛慢煮晚餐，貪佢夠隱蔽，可以慢慢傾計。最近開始熱返，朋友一坐低就叫咗一杯荔枝接骨木花特飲。杯特飲加了雪碧，味道清香，荔枝味道濃郁亦有幾粒荔枝肉。我哋仲叫咗芝士條做餐前小食，新鮮熱辣炸起，外面脆入面煙韌，食起上嚟有拉絲效果，仲可以點mayonnaise食。主菜朋友叫咗紅酒香草燴羊膝，一放低時整道菜煙氣繚繞，睇得出佢啱啱整好。羊肉好好肉地，夠嫩又唔騷，加咗香草令味道更出色。醬汁有小小甜味，點嚟食又別有一番風味。我叫咗香烤三文魚扒，三文魚皮煎到香口，魚肉油脂充足，咬落鬆化。最後，我哋揀咗慢煮紅酒梨子配雪糕做甜品。原隻嘅梨味道帶有好香嘅紅酒味，紅酒煮完梨之後亦同時變到好甜，飲落有啲似mulled wine。配玄米茶雪糕，清清哋同紅酒梨子好同夾。