入麵 (已結業)

如果葵廣係新界西嘅黃店集中地，咁石門嘅瑞京廣場就可算係新界東嘅黃店集中地，今日去到，撞正打風，拿拿林去入麵食個下午茶，然後打道回府。叫咗蒙古風沙燒雞配麻香醬撈麵，雖然係下午茶，但份量非常多，揀撈麵係因為最怕湯麵嘅麵條好腍，而呢個撈麵呢，麵質就唔錯啦，醬汁味道偏濃，上面仲有蔥花同粟米粒，基本上唔使食餸都可以啪哂成碗麵。至於燒雞呢，份量都多，蒙古風沙其實即係避風塘嗰啲炸蒜粒同辣椒粒，呢度落得唔算多，所以「風沙味」唔強，燒雞嘅味道主要來自醬汁，有啲似燒汁，整體感覺唔錯。至於杯珍珠奶茶就正常水準。