心。泰 (已結業)

偶然行開，見到有下午餐食，價錢平，入去試下，估唔到真係喜出望外。叫左兩個TEA，一個係十五蚊的扎肉喇沙配玫瑰薑檸檬疏打，一個係十八蚊的香茅蝦餅串拼玫瑰薄荷茶。扎肉喇沙很熱，椰香味極濃、辣度適中，上碗極靚，係我在香港吃過最似喇沙的喇沙。扎肉就好普通，街市貨，但都OK。蝦餅唔錯，又係上碟勁靚，一枝香茅插著兩件蝦餅，綠配橙黃，賞心悅目，可惜少左O的，得兩塊，味道好，有大頭蝦味，彈牙，有落鯪魚打，雖然油左少少，但十八蚊，想點呀?兩杯飲品都好特色好靚，都有玫瑰花在水面浮下浮下，真係靚到呀...薑檸疏打薑味太重，雖然冰飲都喉嚨都好熱，玫瑰薄荷茶最正，一上時好熱，仲有一片薄荷在水中，薄荷味好重，食完野後飲茶暖左，一飲而盡，嘩，茶過喉嚨個下，真係勁滿足呀。埋單兩個餐計埋加一都唔駛四十蚊，真係抵到暈。