美滿餐廳 (已結業)

一家人去左屋企附近既呢間茶餐廳食下午茶，環境方面都叫做幾乾净，坐得幾舒服。侍應既態度唔錯，幾有禮貌，野食都黎得好快。我地叫左三個下午茶餐，埋單九十幾蚊。第一個係豬排脆脆豬，豬排幾香，味道其實都唔錯既，但係咬落去有啲太硬。另外，舊包都係有少少硬，唔係太脆，好似有啲攤涼左咁，所以連埋豬排一齊食個陣就要咬好耐先食到，如果豬排可以熱番啲，有番’新鮮出爐’既感覺會更好!第二個就係腸仔蛋公仔麵，由於張相係食到一半先影既，所以睇落啲麵好似好漲咁，不過其實味道幾好，當然唔可以話係好出色既。個湯味道唔會太濃，而且份量適中，我覺得唔錯。最後就係雞翼雜果沙律，份量方面幾適中，尤其係近排好多餐廳既沙律份量都係得好少，加上唔會太飽。兩隻雞翼都煎得幾脆，不過個人認為有啲咸，但係三個餐入面我覺得呢個雞翼雜果沙律最好食。