茶木‧台式休閒餐廳 (已結業)

相信大家對茶木都唔陌生，幾常排哂長龍，有大大個關楚耀係出面。每次都要等起碼30分鐘，所以今次醒目，3點幾鐘去食個下午茶，唔洗等好耐，侍應又唔用「眼神」叫你走去到茶木未食過蜜糖磚塊吐司真係唔可以話自己去過茶木，每次必點，有唔同既味，我今次食既係芒果味，上層有一個大大既芒果雪糕球，有啲甜甜酸酸既味道，特別開胃，內層有好多粒點滿左蜜糖既吐司塊，建議就咁食，因為甜甜蜜糖包住香脆可口既吐司已經好夠味，而且蜜糖透每一塊吐司，值得一讚。而外層既吐司因為無蜜糖，就可以點蛋糕同忌廉食。茶木既飲品好抵飲，30幾40蚊就有一大杯，今次我叫既係tree wood 許願樹，因為餐牌無介紹入面係啲咩，只係見圖好靚就叫左。幸好，係一杯酸酸甜甜既飲品，一入口有一陣濃濃既紅豆沙冰味，之後有一重酸酸既莓味，而上面既應該係蜜瓜雪糕，味道出奇地合襯。