点寿司

營業中

休息中

呢間係一間中等價錢嘅日式壽司店，環境都乾淨舒服，用座位附設嘅電子儀器自助落單，會喺側邊嘅路軌直接送上點餐，小朋友會覺得幾得意，好多嘢都係自助式，中途亦都冇人嚟收碗碟，不過佢都係會有加一服務費。極鮮蟹天丼 $68其實主要係想介紹呢個飯，係性價比最高又好食嘅食品。碗面會鋪滿蟹膏、蟹肉同蟹籽，仲有隻炸得香酥嘅軟殼蟹，軟殼蟹炸得好好食，少少鹹味，不過食到第二半嘅時候就會開始覺得膩。好多蟹膏，鮮甜味極重，鍾意食蟹食蟹膏嘅人一定唔好放過。迷你雙色角切魚生丼 $48鋪滿三文魚同拖羅粒，魚生新鮮，不過冇咩特別，整體飯量偏細，一定要額外叫嘢食先食得飽。壽司類食物就唔多介紹，中規中矩，不過不失。唯獨係價錢方面可能就會覺得偏貴少少，下午茶會有平價嘅十蚊碟壽司，普通蟹柳卷之類。