餃掂手工餃子雲吞專門店

次次灣仔lunch搵食都見到呢間野排長龍，呢日夜晚決定去試試。時間尚早，入坐時唔使排隊，但已經坐滿人，到我地食完嘅時候已經要排隊喇。好欣賞一坐底就有一樽醃蘿蔔食，少少辣同酸好開胃。我地仲叫左一樽熱山楂雪梨水，姐姐話係自家制原個雪梨煲嘅，較為偏甜，真係好滑好潤。煎至尊松茸豬肉餃雖然相對黎講較貴，但係招牌菜點都要試吓。煎左一面唔會太燶好香口，豬肉入面會食到一粒粒松茸帶出少少香味，仲有2個醬試多2種口味，但個人覺得唔點醬都好食。仲跟左個狀元九鼎湯，清清地有媽媽嘅味道，可以清下煎餃嘅油膩，飲到最後加少少鹽更加帶到少少魚味。龍鳳松茸灼餃有分黑白松露，豬肉松露係夾嘅，黑松露比較香，灼又比煎更入味。湯元貝豬肉餃雖然唔係招牌但一樣好味，元貝好香，比松茸餃濃味。為左滿足嗜辣既朋友仔而叫嘅重慶鮮肉雲呑，比餃子細粒容易入口，雲吞皮好滑，朋友表示小辣唔夠應該要大辣。原來除咗餃子仲有其他小食，我哋要曬兩款皮蛋黎試。黃金原味皮蛋，個黃好流心好靚，出面少有比較特別，但我都係覺得傳統嘅麻辣松花皮蛋好食。食得出佢地嘅嘢原汁原味，冇味精，下次想食清淡d黎呢到就岩曬！