滿記冰室 (已結業)

第一次黎滿記食野，一黎好少行呢邊，二黎好多人話態度差就唔敢黎試了，是日食開的餐廳無開，就的起心肝黎試下佢。下午茶時段黎，好多人要等兩張枱，但店員好有效率，勁快執完枱仲帶埋位，態度好好喎。點左一份午餐同兩份下午茶，大約十分鐘左右已經黎齊所有野，勁快！午餐有餐湯送，揀左西湯，是日係雜菜湯，勁多菜好濃郁，但個人覺得偏酸左啲。餐飲要左凍檸茶，正常味囉。另外份下午茶加左個意式雜菜通粉，其實同餐湯一樣味，但加幾蚊咁大碗又抵喎。另一杯餐飲要左凍奶茶，幾香茶味，可以多多少少奶更好。下午茶叫了呢個日式宮崎牛肉軍艦，賣相靚仔喎。勁多牛，即刻煮熱辣辣，洋蔥青蔥炒肥牛，香味十足，同埋個包好軟身，吸左牛肉汁正呀。另一份叫左黃金吉列魚柳包，同樣大大份。魚柳炸得香口，入面係千島醬，酸酸地正喎，仲有粗薯條，呢隻薯味濃好食呀。午餐係卡邦尼海鮮意粉，又係大大份，正。卡邦尼味就無乜，食落係黑椒炒意嘅味，但海鮮落左好多，料仲多過意粉呀，哈哈，雖然味道不似預期，但黑椒意都好食。啲野係正常茶餐廳嘅水準，幾好食吖，大大碟價錢貼地，有下次喎！