正斗粥麵專家 (景光街)

營業中

休息中

週四晚冇舞跳，爸爸出咗去開會，靚靚媽咪又唔想煮飯，所以同哥哥就揸咗入跑馬地去家中最喜愛的粥粉麵店「正斗粥麵專家」度醫肚。由於實在太有信心，所以都冇刻意影相，諗住求奇喺面書甫幾張就算。哈，點知小店食物水準大跌watt數，小肥真係煎熬咗幾日先決定要喺度同大家匯報現況。白灼牛肉拼豬潤（$112）：白灼豬潤唔夠肥厚，咬落又老又乾又嚡，白灼牛肉一樣過熟偏嚡，完全唔掂當！炸兩（$46）：炸兩個腸粉外皮夠軟滑，無奈中間條油炸鬼一啲都唔脆，入口又腍又韌，出哂事！炆牛根腩（$98）：牛腩好嚡，啲根就好硬，仲要兩味均只屬和暖，熱力欠奉，如果大肥爸爸喺度一定發哂顛。肥肥家族不時都會幫襯o既「正斗粥麵專家」環境冇變，新舊服務生態度依然良好，無奈廚房未能保持食物質素，除咗啲粥叫做正常啲之外，其他食開o既菜式都唔及以前咁正，衷心希望餐店可檢討一吓。