菓甜品 (已結業)

上次試過菓甜品，啲甜品又靚又特別，今次再嚟試更多其他款式先。本來想試芝士粟一燒🌽，好可惜賣晒啦。店員介紹我哋可以揀個桂花白酒燉雪梨同埋唔係成日有嘅焗蘋果金寶批伴雲呢拿雪糕。桂花白酒燉雪梨原來係凍食，睇個名仲以為係熱食添。桂花白酒燉雪梨原個上碟，夠晒睇頭，雪梨下面仲有一條條桂花糕，晶瑩剔透，幽香撲鼻，雪梨非常滋潤清甜，絕對係秋冬天養顏佳品。焗蘋果🍎金寶批伴雲呢拿雪糕焗得金黃香脆，肉桂味好香，伴碟嘅提子果仁好配合，一齊食口感好豐富。食完熱辣辣嘅蘋果金寶批，再加一口凍冰冰嘅雪糕，一熱一冷，感覺涼爽爽😋。2次食嘅食物質素都好好，無令我失望，唯一失望嘅係食唔到芝士粟一燒🌽，下次又要再嚟食過啦！