何必館 (已結業)

晚晚要食住家菜，最苦嘅相信都係家中最為食嘅大肥爸爸，每隔幾日佢就會話想去邊度邊度，由開頭單憑記憶都演變成寫埋清單！晚市一開，肥肥家族第一炮就試咗最近屋企嘅「何必館」。據悉大廚出自名人飯堂「福臨門」，其後曾被劉富商私有化，來頭絕不惹少；現於新店擔當主理一職已不用管太多了，店名莫非寓意著要豁出去？！間隔以木為主嘅中菜廳設有數間私人廂房，分別可容納二至十六人。用餐大堂簡單以中式屏風裝飾，收銀處則擺放著和風招財貓，傳統嘅風格似乎係會接受來自外國嘅構思喎。服務生專業有熱誠，態度和藹友善。四人被安排入座廳內近窗嘅圓枱，配上厚墊椅櫈，舒適闊落。舖上枱布嘅餐桌上除咗每位席上擺有齊備嘅自用及公用餐具之外，亦有提供濕紙巾及口罩套，衛生意識極強。因深知傳統功夫菜有部份需時備製，所以訂座時已經寫咗幾道餸。中英對照嘅厚本餐牌共有十三頁之多，其中最後一頁列出雜項收費詳情，包括茶錢（$20/位）、切餅費（$100/個）及開瓶費（$200/樽）；眼見網上資料未為齊全，細佬就藉此機會續一上載。蟹皇海虎翅（$1,580/位）：為咗要試多幾款菜，所以就訂咗兩碗媽咪想食嘅蟹皇海虎翅分，廚房好有心地預先分好四個半碗，認真體貼。