等 (已結業)

朋友住太子，知道新開咗呢間文青系cafe，又係黃店，所以決定試一試。我早到，當時12:30，但朋友未到，我見店入面都幾多吉位，就喺店外嘅長凳坐住等朋友。坐咗一陣，侍應開門，我諗朋友都就到，不如入去坐住等，但侍應話要人齊先入得—ok，好正路。隔咗10分鐘，我朋友嚟到，同時亦有另外兩個客人嚟到店舖前。侍應畀飛我哋，但明明我到先，侍應畀2號飛我，畀1號飛另外兩個客。我當時又冇乜所謂，心諗應該都好快入。點_知，原來入面好多枱都係訂枱，1號飛入咗去，我同朋友等到1:30都未入得。又有另一對情侶嚟到店外，但佢哋等咗一陣，原來係有訂位，又喺我哋之前入席。其實係溝通問題。我見有對walk-in父子嚟到，個侍應又識同佢哋講應該要等到2:30。頂，你又唔同我哋講？我哋一直戇居居坐喺出面。我同朋友問，佢又話「唔好意思，要等一陣」。我真係估唔到「一陣」係咁耐。大家要去試呢間店，記得訂位。朋友住附近，話都會再畀機會試吓食。我就「等」到成肚氣，不了。