niji bistro, Noritake - Gifts (已結業)

阿女睇卡通片見到蛋包飯想試，我地趁放假嚟呢間餐廳試菜。由於假期，我地下晝兩點幾都仲見到有人龍。我地三個人點咗兩個蛋包飯，另加一個意粉諗住冇咁漏…墨魚汁蛋包飯嚟到時個買相既靚，阿女初初見到時搶住要試，但佢一切開見到入面啲墨魚汁飯黑蚊蚊，之後掂都唔敢掂。佢入面個飯底係意大利飯，啲芝士汁搞到立痴痴濕達達，餸就得果兩粒帶子同入面少少海鮮碎，口感似阿女細個既飯仔。我從來未食過日式蛋包飯，我唔知日本正宗果啲係咪到係咁，總之呢個味道唔係我杯茶。另外我地叫既炸蝦蛋包飯，佢個飯質感都係濕立立，加上佢個龍蝦汁帶少少腥，阿女同我都唔係太鐘意，食咗少少飯同兩隻炸蝦就算，剩番既全數由老公硬哂佢…最後我地兩母女唯有主攻個帶子意粉，佢個意粉係波菜麵，口感好清新，不過佢入面有紅椒，要揀哂出嚟阿女先食到。一心要來食蛋包飯，結果變食意粉，白行一倘。