スーパー丼 (駱克道) (已結業)

都有一段時間冇去專食丼飯既餐廳，今次嚟咗大熱店「Superdon」。環境係正銅鑼地鐵站對住既駱克道，地理位置十分方便，餐廳設計以白色做主調，比較清新。餐牌唔止刺身類既丼飯，仲有熱食丼、小食、串燒、單點刺身，種類唔會單一。特上北海道丼 $198包括帆立貝、三文魚籽、海膽、吞拿魚腩蓉及油甘魚，仲附有青瓜及味噌湯。丼既份量唔算好大碰，相信女士們都應該能夠食得哂，每款刺身都係兩件，帆立貝幾嫩口，質素可以；三文魚籽、海膽都新鮮，唔會有腥味，仲幾鮮甜，撈飯再加撈甜豉油一流；而吞拿魚腩蓉及油甘魚相對上就比較遜色啲，望落去色澤冇咁亮麗，吞拿魚腩蓉唔算好香，油甘魚油脂唔夠，整體平庸。滑蛋親子丼 $68即滑蛋雞肉丼，叫左一個刺身丼，另一個就叫左熟食，揀左滑蛋雞肉，同樣附有青瓜及味噌湯。份量比較多，滑蛋做得幾嫩，雞肉亦不少，加上蒽碎、洋蔥、芝麻，食落味道會豐富啲，再加豉油，食哂成碗絕對唔係問題！總括而言，刺身丼還可以，不過我覺得唔一定叫“特上北海道丼”呢個價位既刺身丼，因為都比較貴，可以食返好似“三文魚親子丼”、“火炙三色丼”等等呢一類，價錢都比較平啲，而熟食丼就幾高質，下次再幫襯會再試其他熟食丼。