吉利日本美食 (已結業)

響香港食過好多日本料理，大都冇嚟文味，所以以前返屋企日日都行過吉利，見只是小店一間，完全冇意欲要去一嚐。直至幾年前，居然幾次見到一些重量級的名人（真係一線名人）從店內行出嚟，就諗，這間店都幾堅，於是單人匹馬去試菜。過到我第一關先再同鄉親父老嚟過。結果係唔止合格，而且超出我想像。今晚，阿媽生日，真係不敢怠慢，所以一早在吉利訂好位，希望一家人開開心心食一餐生日飯，最後當然冇令大家失望！阿媽食嘢好挑剔，可能佢小時候住在海邊，佢話以前啲鄰居一早就划小艇出海打魚，清晨還在睡夢中，就聽到從海中傳來「叮叮叮」漁民敲船趕魚的聲音，打上嚟嘅魚冇腥味，佢形容係「一陣陣海水嘅香味」，可能她走過食到真味嘅歲月，所以佢唔多喜歡出街食飯。佢話而家出街食飯要講平衡，唔一定要樣樣係絶味，因為已經唔係佢以前個年代。現今食到新鮮，口感舒服，味道不落俗套（這個最難做到），腸胃有好反應的就係好餐廳，而吉利就係一間這樣的餐廳。註：1.吉利的餐具同食物一樣講究，手工十 分精緻。2.他們的營業日也非常有個性，每年都會有幾次不定時放大假，據說係店主去咗日本充電，同搵新食材。唔想撲空，去之前最好打個電話睇下有冇放假先。