梅窩麻糬王 (灣仔道)

營業中

休息中

作為麻糬波波控，成日都會留意邊度有麻糬波波推出。小至街坊麵包舖，大至受歡迎排隊長龍店，都會去試。目標係搵到性價比高，有好食嘅麻糬波波。呢間梅窩麻糬王，成日見到有人介紹，初初以為要專登去到梅窩先有得買。但係原來佢哋港九新界都有好多唔同分店。今次咁啱路過，即刻買黎試試佢。麻糬波波有好多款式，全部都已經入晒袋包裝，單一口味賣緊$25-$35/ 六粒，混合味道價錢會貴少少。不過聽講佢特色味道係會有包裹內餡，唔同一般既麻糬波波，所以就揀左mix 既口味食完其實都有啲失望，麻糬個面比較硬，咬落去雖然有內餡，但係唔夠煙靭。由於鍾意食煙靭口感嘅我嚟講，真係有啲失色。就算焗熱咗都唔算煙韌。個人覺得抹茶紅豆味比較出色，食到紅豆粒。朱古力味較為鬆軟而肉鬆味就偏乾身。總括而言，性價比欠奉，試過一次就可以。追求煙靭口感嘅麻糬波波就未必會揀呢間。