板長壽司 (已結業)

我同老公想食壽司但又懶行出街所以叫外賣,老公話之前成日叫元祿不如試吓板長,於是我哋打電話order咗：火炙鰻魚、三文魚刺身、蝦天婦羅、炸蠔、燒鵝肝、西京燒三文魚鮫、燒三文魚頭、辣味三文魚手卷、蝦膏甜蝦軍艦一共$261.00(其中$10係delivery charge),而值得讚一讚落order嗰位小姐因為佢好有禮貌,不過可能係星期日所以成個幾鐘先送到！食物當中我哋最鍾意同覺得最好食嘅有火炙鰻魚、西京燒三文魚鮫同埋燒三文魚頭,其次係三文魚刺身同炸蠔，最唔滿意嘅就係包住辣味三文魚手卷同蝦膏甜蝦軍艦嗰塊紫菜一啲都唔爽勁腍，至於其他食物則屬一般，整體而言不過不失，價錢方面亦算合理！不過,最想食嘅海膽刺身、海膽軍艦、炙燒三文魚同埋鹽燒三文魚腩邊都話賣晒,所以有少許失望,唯有下次先再食過！