金裝燉奶佬餐廳 (已結業)

自從體檢驗出有脂肪肝，家母每朝都會為小肥煮製健康美食帶返公司食。點知細佬有一日，朝早忙著出門口之際，竟然大頭蝦到遺留咗份午餐喺屋企，嗰日除咗激嬲咗媽咪之外，中午當然係要落街搵野食啦 ！結果就同靚仔經理求其去咗附近一家茶餐廳「金裝燉奶佬」，食咗份午市套餐。灣仔道嗰間「金裝燉奶佬」同其位於福和街間分店o既間隔差唔多，感覺好方形，大多以兩至四人枱為主。散座黃色o既厚墊櫈令餐廳望落去更光鮮明亮，而且亦都幾好坐，不過最好可以坐到卡位，享用更多o既私人空間。燉奶佬地方雖然談不上一塵不染，但總比一般茶餐廳乾淨企理。店內o既伙計大多為後生仔女，態度唔可以話十分友善，不過手腳都算快。午飯時間只有一個鐘，所以我地每人都係叫咗份精選午餐。 精選午餐之白汁野菌雞皇飯（$41）：白汁野菌雞皇飯可以話係不過不失，野菌爽脆，雞胸件一啲都唔嚡，只係層外皮有少少硬，白汁味道香甜，問題係個汁杰得滯，同埋整體唔夠熱。 精選午餐之餐湯：中湯為老火湯，西湯則為羅宋湯，睇相就知兩款都幾油，而且好浠，又冇乜料，早知叫杯咖啡飲好過 。「金裝燉奶佬」午市主要做附近寫字樓工作人士o既生意，地方比一般茶餐廳較為舒適，食物質素唔算好