LA Restaurant & Dessert Bar (已結業)

最近呢間威靈頓牛柳好出名，當晚排咗40分鐘左右。點咗威靈頓牛柳，加$30配鵝肝多士，本身威靈頓牛柳已經包咗麵包、湯仲有嘢飲，所以冇再額外加錢要side dish.一開始嚟咗忌廉湯同埋蒜蓉包。忌廉湯係平民西餐廳一般飲到果種。蒜蓉包就配上調左味嘅蕃茄碎，上當開胃。鵝肝多士上枱嘅時候有啲失望。因為見到其他食評嘅鵝肝都係完整同埋有相當嘅厚度，但我嗰塊好似切爛咗，煎過熟同埋唔厚。因為本人好鍾意食鵝肝，所以我請侍應換一塊比較完整嘅。侍應解釋佢哋係買大嚿鵝肝返嚟自己切，所以換過件都係會咁嘅樣。之後我望到隔籬枱嘅鵝肝同我嗰塊差唔多樣，我就冇再要求要換，始終加$30都唔會太高期望。因為煎太過耐，食落冇平時食開嘅入口即溶嘅感覺。期待已久嘅主菜威靈頓牛柳終於上枱。雖然唔期望係正宗嘅威靈頓牛柳，酥皮亦冇包晒塊牛柳，但係賣相唔太差。冇加錢要side dish都有啲沙律同埋瓜類同菇類左半碟。牛柳切開都冇乜筋。我叫咗五成熟，望落去差不多。食落去酥皮可以接受，牛嘅味道唔出亦唔係特別juicy. 所以成餐飯我認為不過不失，午餐唔過$100就比較抵食，但晚飯需要$198就真的不要期望太高。