2+2 Café (已結業)

見facebook正推廣3月份新出的士多啤梨芝士甜品，作為甜品迷，當然要試一試。雖然話鐘意食甜品，但其實平時唔多去甜品buffet，頂多係正餐buffet搭埋甜品任食個種。平日黎到幫襯，原來都唔少人，特別係估唔到好多小朋友，因為本身諗住會係女性黎食居多。甜品款式唔算多，得10款左右，另外仲有雪糕同即場整既雞蛋仔、班戟等等。原個要自己切件的士多啤梨抹茶蛋糕都ok，但有時中間d抹茶cream好似未解夠凍，有d似沙冰。而細細舊易夾的new york cheesecake就最好食，比燕窩芝士撻好食。一杯杯的甜品有一隻特別奇怪，就係朱古力熱情果奶凍，因為兩種味根本唔合拍，到頭來最少人攞就係佢。雪糕係movenpick，自己覺得味道最好個款係藍莓芝士餅。其實最估唔到係有少量熱食供應，個蘿蔔糕好濃味幾好食，而最正係卡邦尼長通粉(or意粉)，因為同樣d醬料好入味、好濃厚芝士感，可以中和返d甜膩。另外仲有哈蜜瓜粒同菠蘿粒，不過味道普通。質素唔係話頂級，但$140左右食到唔少野(雖然覺得蛋糕款式可以再多返d)，味道又過得去，咁已經算係滿足到甜品控一時的心癮。