功德林上海素食 (已結業)

-今曰放假，陪老媽子食晏。佢年紀比較大，所以要選啲唔硬同埋易消化嘅食物。剛好經過功德林就入去試吓。可能因餐廳位置及時間關係，只得大概一半座位係有食客，故無需等位。甫坐底，服務員便遞上餐牌。餐牌上有午市套餐及散叫。但套餐只有一款，唔係好啱食，故此點咗南乳香芋滑雞煲，砂鍋鹹肉莱飯同埋桂花八寶飯。南乳香芋滑雞煲好惹味，豆卜，草菇，芋頭等材料均十分入味；砂鍋鹹肉菜飯炒得好亁身，唔會油淋淋，仲要有少少飯焦添。後上嘅桂花八寶飯係用黑糯米整，裏便有蓮子同紅棗，但唔會太甜。另外碟邊淋上桂花汁，賣相唔錯。埋單連埋加一約240，覺得食物價錢尚可接受，但茶芥12蚊一位則稍貴。環境清靜同埋服務員態度殷勤。另外亦建議餐廳可多設計一兩個套餐，讓食客更多選擇。