Rooftop Café by Momentum Coffee (已結業)

首先講甜品，當你睇到等咗一段時間送上嚟嘅pancake有一面燶到同隻黑色碟一樣咁黑，同waiter投訴完道歉都無句，仲答返你呢度就係食咁燶，你地唔鍾意就cancel，你會有咩感受？點解廚房會俾得出咁嘅食物？點解waiter講得出咁嘅解釋？講返剛到餐廳樓層一出，眼前一堆紙箱等雜物，行入餐廳嘅通道淨係一個人過到，第一感覺已經唔太好。人手唔夠，食物到咗只俾一套餐具，要問至再俾，甜品到咗又無幫手換新餐具同碟，都係要叫至換，服務上唔夠妥善。鹹點就大部分都好食，原本跟明太子忌廉意粉嘅海膽蟹肉已經無晒，轉咗帶子同蝦，整體好食。All day breakfast味道正常，薯餅後上，不過之後睇返其他食評嘅相，唔知點解我地叫個碟冇咗牛油果，waiter亦冇提過。雞排意粉啲雞排好鹹，係呢樣最差。熱飲唔夠熱，凍飲ok。當日係慶祝朋友生日，非常掃興，唔會再嚟呢間咁嘅餐廳，唔該餐廳好好檢討出品同員工質素。第一次寫食評就係劣評，非常不滿同無奈。