揀得啱車仔麵 (已結業)

🏡本身我都幾鍾意食車仔麵，原因係鍾意款式夠多，每次都可以選擇唔同嘅湯底，嚟多幾次都唔會厭😄呢間揀得啱車仔麵，我都嚟過好幾次🥰鍾意呢度地方企理，乾乾淨淨，而且燈光光猛。要數我嘅至愛，就係呢度嘅✨麻辣鴨血～口味係微辣+微麻口味，即叫即熱，口感爽滑，好香口！呢度有個三餸一麵嘅套餐，送埋飲品都係50蚊，份量夠豐富，仲可以自由選擇麵底或生菜底添。呢度目測至少有三、四十款菜式，多到不能盡錄😆我最鍾意嘅幾款✨午餐肉～超級大塊，厚度達1cm，而且仲細心地煎過，食落外面脆脆地添✨豬大腸～滷水汁甜甜地，而且唔會太油膩，炆得夠淋✨白蘿蔔～明顯用上高湯煮過，清新又入味✨黑松露餃子～一咬落有好香嘅黑松露味，食得出係冇落味精👍內裏嘅豬肉都好爽滑，明顯新鮮製作！