文樂園 (已結業)

幾年前呢間點心店剛開張果時幫襯過，印象質數麻麻地。今朝起身想食點心，又唔想行去旺角飲茶，不如試多次文樂園啦，見佢Open Rice 都係正評多過負評（同埋我心諗：事隔幾年，或者有進步呢！？疫情都捱得住嘅食店，應該唔會太差卦！）誰不知一試，仲衰過以前！蝦餃燒賣‘’乾爭爭‘’！ 我買完外賣番屋企開嚟食，前後唔洗5分鐘，點會乾到咁㗎？！！D皮乾到‘’硬掘掘‘’， 好似食緊膠咁！個蠔油鮮竹卷正確名稱應該叫‘’漿糊塑膠卷‘’！我覺得個鮮竹卷直情係成舊炸完再蒸！！！佢menu 豎咗手指公嘅鮮蝦春卷都強差人意，個皮係脆卜卜嘅，不過入面咬落係好似有少少蝦+"一pad嘢‘’， 未至於好難食，但真係唔好放隻手指公誤導人，賣$24三件，貴過$22三粒嘅蝦餃。最後就係個温泉蛋牛肉盅頭飯，其實只係將塊山竹牛肉餅放落白飯上面，唔係我諗緊嘅盅頭飯：餸連飯蒸，D飯有餸汁味。不過算啦，佢真係賣好好好平，仲要個盅飯係用紙盒包住錫紙兜，包埋餐具都係收$28！真係冇乜錢賺！我真係好少寫食評，但真係唔想其他人中伏！講真，何文田附近幾條街都冇呢類型點心店，算係獨市，照計應該好多捧場客！認真檢討吓改善吓，唔好辜負我哋D街坊啦！蝦餃