茶墨 (已結業)

響The One行街，行行下下見到新開左一間台式飲品店。近來呢類台式飲品店越開越多，多過7仔，但呢間茶墨嘅出品又好似幾有特色啊！叫左2杯signature嘅飲品：芝麻烏龍麻糬鮮奶同紫薯鐵觀音堅果奶蓋。呢間店仲set左個打卡位俾人，咁杯野配埋個背景都靚嘅。除左打卡位，呢度仲有少量座位俾人坐住慢慢歎。黑芝麻同紫薯嘅賣相好靚，好似中國嘅潑墨畫咁，好有藝術風。一個簡單嘅飲品都整得咁靚真係好有心思，咁靚嘅嘢當然要攞過去打卡位影返張相影放上IG啦。黑芝麻鮮奶好重芝麻味，但又唔會太甜，仲有細細粒嘅麻糬好Q，其實比出面啲黑糖珍珠鮮奶更好味，更健康。至於紫薯初時以為會非常甜，但飲落去其實啱啱好，只係比黑芝麻是略甜少少，好重紫薯味，但飲完唔會覺得好滯。見佢啲雪糕嘅味道都好特別，所以忍唔住叫咗一個玫瑰味嘅雪糕。好少見到有玫瑰味嘅雪糕，所以試吓先。估唔到雪糕嘅顏色係咁啡，令我嚇咗一跳，但食落去真係好重玫瑰味，好好味呀。