匠心廚房 (已搬遷) 新店位置

美孚新邨呢個小住宅區都有好多唔同嘅食店，今日黎食匠心廚房。先叫咗個滋補燉湯，都幾足料夠味。入邊有杞子、雪耳及節瓜等。秋冬飲就幾滋潤。另外叫咗粟米魚肚羹，好多粟米同蛋花，仲有魚肚添。前菜叫左老醋木耳拍青瓜，木耳同青瓜都好爽口。叫咗個菜拍蒜醬油豆角，呢個偏濃味，醬油味可能太多，同埋有啲炒到燶燶地嘅味道，份量都算多。當歸參片四珍雞，有蟲草花、參片、冬菇及杞子。當歸味幾重，蒸雞夠熱辣辣。冬天食嘅話幾暖笠笠。欖菜肉碎缸豆炒飯，呢個我覺得最好食。因為炒飯炒得夠乾爽，而且幾足料，個味幾香，不過就略嫌鹹咗少少。呢間小菜價錢算經濟，適合一家大細食。