籠太子點心專門店 (已結業)

今日到筲箕灣處理一些文件，放工約老公食晚飯，港鐵站附近筲箕灣東大街揾到間點心專門店，經濟實惠，難得夜晚時間吃點心，感覺好舒懷。每枱都會提供特製辣椒油、喼汁及醋，落幾多自己決定，發現辣椒油其實係XO醬，加入蝦仔，好香，辣得夠惹味。籠太子蝦餃皇~兩個人可以叫兩粒試下，不錯呢。多汁小籠包~果然好多汁，要小心夾，皮薄餡靚，食小籠包一定要落少少醋啦。雪山叉燒包~熱辣辣，邪惡的配搭，表面酥香，內裏叉燒好滋味。皮蛋牛肉腸~呢款腸粉酒樓都未必食到，欣賞你，皮蛋牛肉配搭好好，即叫即蒸，腸粉好滑，店員好細心，會問落幾多豉油，佢建議落埋一邊，牛肉本身都夠味。石斑荷葉籠仔飯~熱辣辣香噴噴，石斑好新鮮，啖啖肉，個飯係用雞蛋炒底，好香口。來個甜品，椰汁桂花糕~好有心機，總共有五層，味道唔會太甜，椰汁味香，冰凍爽滑透心涼！自家研磨凍豆漿($10/支)~茶位每個$3，天氣真係好炎熱，老公叫咗支冰凍豆漿解解暑，自家製一定比較健康。