鳴越 Pho

營業中

休息中

經過中環街市見到依間新開嘅越南Pho，晚市套餐$63-$82不等，奉送熱飲無加一，中環價嚟講都算合理。坐低同店員傾兩句，原來餐廳係同區同名「鳴越越式料理」嘅分店，過往評價都好高，相信分店食物質素都唔會差。嗌咗最經典嘅越南生牛肉檬粉－檬粉幼身易夾，湯頭夠清甜，有九層搭、洋蔥同葱花令味道更濃，再按自己口味加上辣椒粒同青檸汁；牛肉被熱湯輕灼仍然非常粉嫩，份量亦都好多。越池豬扒本身跟飯，店員表示亦可以隨意配搭粉麵，所以揀埋金邊粉試試。金邊粉烹煮時間剛好唔會太腍，豬扒外表好吸引，食落juicy唔乾柴，調味足夠唔洗點辣醬已經好好味。安南手作粉卷第一次食，粉皮好似薄身嘅腸粉，入面包裹住甘筍、沙葛、木耳絲同豬肉粒，口感豐富，面頭更有惹味嘅葱油同炸蒜令粉卷食落更香口。跟餐嘅香滑奶茶同平時茶記嘅差唔多，順滑帶啲苦澀，係香港人嘅口味。