泰潮 (嘉咸街) (已結業)

近排成日ot放工喺中環，唔知食乜好。記得上次食過泰潮嘅 米芝蓮海南雞飯， 印象深刻好食，即刻和同事兩個人去食先！今日可能太夜，海南雞已經沽清！不過見到佢嘅一人餐，都幾豐富經濟實惠，一於試下！泰式蝦球炒金邊粉用心形碟上盤，鋪上網型炒蛋，有如蛋包飯，賣相吸引。金邊粉質地偏硬適合乾炒。泰式炒法香口惹味有鑊氣唔油膩，材料豐富，大蝦彈牙爽口，味道一流！菠蘿海鮮炒飯有 新鮮菠蘿粒 臘腸粒 大蝦 魷魚、提子乾灑上腰果、肉鬆。卜卜脆蝦味濃，大蝦爽口鮮甜 ，炒飯乾身，粒粒豎起，炒得均勻軟熟有嚼口！串燒雞肉燒烤焦香撲鼻，沙爹醬汁辣裏帶甜，無骨啖啖肉大快朵頤。香茅雞中翼淡淡香茅清香，乾身唔油膩，肉質嫩滑惹味。泰式凍檸茶泰式紅茶底美 醇厚，帶有東南亞特色風味。隨餐附送椰汁糕，冰涼清甜有椰汁味！