木子園 (已結業)

中環The L Place新開咗間京川菜木子園，今日就約埋朋友一齊去試新嘢。餐廳嘅裝修佈置，令人感覺尤如置身於園林之中。除咗門口花園背景嘅鞦韆打卡位外，餐廳正中央嘅櫻花樹同樣吸睛。櫻桃鵝肝擺盤回應返餐廳園林主題，鮮紅色嘅櫻桃醬包裹住櫻桃造型嘅鵝肝，香滑味美；樹上嘅手工龍鬚糖，又鬆脆又甜，加埋由乾冰凝造嘅仙景效果，真係極盡視覺和味覺享受。松子桂花魚造型生猛。服務員會待大家打卡過後，協助分發魚件。桂花魚皮脆肉滑，松子鬆脆，配埋酸甜度剛剛好嘅糖醋汁，特別開胃！灌湯小籠包滾熱的濃湯注滿皮薄肉鮮嘅小籠包。一口咬落去，爆汁惹味！