霞飛會館 (已搬遷) 新店位置

以前間中會約同事嚟食晏，雖然要等位，但鍾意坐得舒服食餐好，當係返工做餐死的慰勞。好耐好耐冇嚟，呢日舊地重遊，食晏唔使等位，發現冇再供應午餐，變咗一係食商務套餐，一係散叫，消費升晒級。叫咗幾款大路食品，最冇期望的煎鍋貼，竟然全枱一致讚好。鍋貼底煎得香脆，皮薄餡多，咬開有少少肉汁，餃子收口靚，口感同味道更勝小籠包。口水雞，件數足，皮嫩肉滑，唔會骨多肉少，醬汁屬少辣少麻，冇老掌櫃個汁咁惹味，雞件質素就高過老掌櫃。招牌海皇炒飯加咗蝦醬，材料有瑤柱、帶子、蛋等等，色香俱備，略嫌鹹咗啲。甜品揀咗炸物脆皮腰果湯丸，熱辣辣上枱，要攤一陣先食。佢外脆內軟，煙煙韌韌，餡料屬少甜，腰果味非常低調。少食知味，一人一粒，份量最啱。