快船廊

營業中

休息中

之前講到今次食 Brunch，蒸海斑係其中一款必食，其餘心水推介不約而同係熱食，分別係干燒伊麵、蝦餃同和牛。自助餐的焦點慣常係甜品同海鮮，甚至片皮鴨，干燒伊麵永遠只係綠葉。不過，今日呢碟干燒伊麵令我對M.O. 的中菜廚師大大改觀。每條伊麵都有上色，而且色澤均勻，食到有鑊氣，更重要係麵條的處理，唔係被淥到軟弱無力，你係會食到麵條本身的質感，入口清爽輕盈，成口油同肥滯全部消失。呢碟麵，高級食材欠奉，望落平平無奇，正正埋藏咗廚師的真工夫。蝦餃，皮薄飽滿，賣相靚，蝦肉爽脆，調味得怡，同 Moet & Chandon Brut 的甜美頗搭配。服務周到的侍應先生，適時從廚房端來日本和牛，每人一碟，一碟兩件。熟度剛好，咬落軟熟具肉香，肉汁豐富，油份唔太高之下，仲有空間進攻甜品同芝士麵包區。藍面 Opera 與芝士餅水準依然出色，朱古力 Brownie 用料豐富，威士忌軟心朱古力今日獨領風騷。飲到臉紅耳熱，借一球 Lime Sorbet 降温。美好的周日大半天，莫過於此。