稻香 (青衣城1)

營業中

休息中

第二餐中秋團圓飯，今次都係親友訂枱，又咁啱都係稻香，不過係第二間分店，諗起前幾日一間分店嘅混亂情況有啲怕怕。不過今次呢間比前幾日好好多，客人無咁多，職員人手亦足夠，態度亦比較好。我哋一行8人加個Bb，職員主動拎bb櫈。食物方面我哋揀嘅係自選套餐，部份份量比較小，味道可以，不過最緊要大家開開心心。燒味拼盤麻麻，叉燒同燒肉肉質唔鬆軟，雞同燒鴨都無咩肉。蒜茸蒸貴妃蚌幾好，新鮮大大隻，蒜茸味唔突出，粉絲份量亦唔少。上湯波士頓龍蝦伊麵有兩隻龍蝦，肉質彈牙，汁亦夠多，唔錯。白灼海中蝦都新鮮㗎，都幾大隻。翡翠鮮鮑魚，吸收咗果皮香味，唔會太細隻又唔韌。勝瓜雪菜浸黃花魚，味道唔難食，但係魚肉真係幾鞋。西蘭花炒元貝，元貝大大粒，西蘭花翠綠，可惜份量較少。食埋壽桃包，完結。