文聚料理(分子) (已結業)

平時比較少食中菜，但講到中菜最鍾意嘅一定係呢間文聚，唔好俾佢異常罨耷嘅裝修嚇退，其實呢間嘢真係又平又好食😂 平時都係食客飯，今次難得五人成團終於可以叫佢啲小菜食✨菜色選擇唔多得十零款，但勝在款款出色，最想試嘅煎蝦丸過百蚊以該店計都幾貴，但用料新鮮蝦味濃郁，質感超軟彈，上下煎香夠惹味。而兩款煲牛腩同鎮江骨都係無可挑剔，同之前食嘅一樣入味夠腍，以小菜型式叫就會改用砂煲上碟，一路熱住夠哂熱辣之外仲更加香口✨ 至於無敵水晶雞雞味依然香濃，係部分位置冇之前食咁嫩，始終成隻雞總會有部位唔同，唔太多人的話叫個例牌就夠😌