小包包 (已結業)

朋友話中環有間餐廳係亞洲第一女廚師開既，當然要慕名而來啦。無得book枱，只能walk in。我地七點拎位，點知店員同我地講預計要等到9點先有位，仲要係星期一唔係假日，可見其受歡迎程度。呢度d包同平時食既漢堡包有d唔同，個包有d似饅頭，有饅頭既香味甜味，但係又較一般饅頭軟熟。而且個包底部有輕微咁烘過，所以脆脆地，口感更爲豐富。我地叫左佢個signature - Pork Belly，豬腩肉好大舊，而且非常肥美，油香十足。原本以爲豬腩肉會好油膩，但係又唔會。 豬腩肉加埋d芝麻醬海鮮醬又意外地夾，食到另一種味道。另外仲叫左個Fish Tempura，個配搭無豬腩肉咁大驚喜。可能因爲西式漢堡包都有炸魚呢個配搭。但都唔差既，炸得幾好唔油膩，肉質唔會散，加埋d中式d既配料，有酸菜及香茅等，比你食到同出面不一樣既炸魚包。另外仲叫左個hidden dish - sake ice-cream。炸饅頭夾住清酒雪糕，配搭非常有趣。即叫即整，外面係鋼炸好又熱又脆既饅頭，裏面係又凍又軟既清酒雪糕，令人一試難忘，不過略顯清酒味道有點兒淡。雖然份量睇落唔大，但其實原來都幾飽。想試吓不一樣嘅漢堡包可以黎試下。