Food Combo (已結業)

對我來講，屯門真係一個好陌生嘅地方，隨時係用埋Google Map都會蕩失路！呢幾日竟然又要去屯門開工，真係令人好擔心，好彩出外靠朋友，梗係捉住屯門地膽老友問路啦，麻煩左人就梗係要自己識做，於是就請佢食晚飯，佢話佢都冇乜idea，於是就邊行邊搵，行吓行吓就嚟到呢間餐廳嘅門口，侍應哥哥好落力咁樣Sell我哋，見過價錢同埋啲套餐個樣都唔錯，於是就入去坐低。呢間餐廳主打西餐配以日式定食setting(呢個係侍應哥哥咁講嘅)，對我來講就即係將啲西餐搞到乜都有啲，然後整到細細份。佢啲餐有接近一百至到手二百幾，本身睇中過$176嘅西班牙海鮮飯，但係驚中伏，於是就揀咗個平啲嘅葡汁雞扒，至於我老友就揀咗粗身長通粉，兩個主菜都係味道正常，未算有驚喜，每個套餐都會跟一個湯、一個小食、一個沙律同埋一份生果，感覺似飛機餐。呢間餐廳最值得一提嘅賣點就係佢有兩款特飲加凍檸茶係飲飲嘅，呢兩款特飲就係杞子桂圓生薑水同埋薄荷橙水，一熱一凍，可能係成餐最唔錯嘅嘢。