韓家韓國料理 (已結業)

喺一個風和日麗嘅中午，成班同事行行下，就行到嚟呢個商埸，然後有意無意咁，就入咗呢間韓食餐廳。見到個餐牌(應該係點餐紙先啱)上面D食物名稱，都真係幾韓國feel。全部都係韓式乜乜，或者泡菜乜乜咁。本來想食"炒辣雞配年糕"，但又怕會太辣，所以問店員可否少辣，但店員話無得揀，所以無叫到，心諗唔通並非即叫即煮，而係預先煮定曬，所以無得調整辣度？不過唔緊要，"韓式烤牛肉炒粉絲"都係我嘅至愛之一，一於揀牛肉炒粉絲啦。雖然我地一行6人，但全都選擇炒粉絲或"韓式烤牛肉飯"，再加一個"泡菜煎餅"試下。三樣食物嘅調味都中規中矩，無特別特出之處，當中嘅牛肉都全比較硬身，要用多少少牙力。三樣食物之中，牛肉炒粉絲質數係最差。除咗牛肉硬之外，粉絲嘅浸泡時間亦明顯唔夠。直程係半生熟，硬倔倔一餅，分都分唔開。真係想向店家反映，叫佢地再換過，無耐碟粉絲已經等咗廿幾卅分鐘先上倒枱，已經要食得好趕。試問一個打工仔嘅lunch time，又點可以容許再等多廿幾卅分鐘俾佢慢慢玩呢?所以就冒住食完會胃痛嘅危險，食咗小半碟就埋單走人。另外想建議一下，個炒粉絲嘅調味可以再濃多D。