舞心拉麵 (已結業)

銅鑼灣區真係有好多拉麵店。一蘭開咗之後相信對附近嘅店舖會有一定嘅影響。星期日下晝，連豚王都唔洗點排隊，位處對面嘅舞心就更加唔洗講。呢度亦係主打豬骨湯拉麵，分白（原味）、黑（濃味）、同赤（辣味）3種。每款拉麵都可揀選叉燒同蛋嘅份量，價錢由$68-$93；最少有一塊叉燒，到最多4塊叉燒加1隻溏心蛋。每碗另有少許蔥，芝麻同筍，其他配料如木耳或紫菜要另嗌。繼續支持辣，所以我order咗赤，由於menu冇寫辣度，問問店員，佢話可選大、中、小辣。咁我揀大辣啦，麵要普通硬度。湯，橙橙的，濃度一般，有點稠，但都夠豬骨味。其實香港人唔算食得好濃，太杰太濃嘅濃底反而會好滯。湯面有好多油，相信大辣係靠加較多嘅日式辣油。起初覺得唔錯，但食食吓有點咸。麵較幼，＂普通硬度＂，但覺得都係淋咗少少。雖然麵條可索多啲湯，但唔係好有口感。叉燒肥瘦均勻，燒得好香。溏心蛋一般，質地軟身同帶點咸。枱面有幾款調味，所以亦試一試。拉麵胡椒好香，辣油只係普通港式辣油。呢度以木為主調，設計簡約。枱唔太逼，坐得舒服。整體嚟講拉麵中規中矩，價錢合理，都可考慮再幫襯。