茶餐廳2.0 (已結業)

和朋友行完南豐紗廠，順便過來愉景新城食野，朋友想食西式野我就想食中式野，最後揀左茶餐廳2.0就最啱，餐牌菜式睇落樣樣有都幾多選擇。餐廳環境乾淨，卡位闊落坐得舒服。埋單二百幾蚊唔貴，價錢算係經濟味道亦都唔錯。羅宋湯 $10湯味濃郁大碗足料，好多雜菜煮得好淋，紅蘿蔔、西芹、椰菜、牛腩都見，酸酸甜甜開胃好飲。蒜香大蝦卡邦尼意大利粉 $75意粉軟硬適中份量多而且好掛汁，大蝦爽口彈牙有大篤蒜蓉好有蒜香味，仲有好多其他配料三色椒絲和菇菌，口感豐富。沙爹石窩粉絲鮮蝦煲 $88有大碗白飯跟，石窩熱辣辣滾住食，鮮蝦多隻好香口，粉絲索滿沙爹汁好惹味，仲有菠蘿粒食落開胃。黑糖椰果鮮奶 $14奶味香濃且滑，好香黑糖味，味道比較甜，下次要少甜，杯底勁多Ｑ彈口感的椰果好有嚼口。雙重朱古力 $19朱古力味唔算好濃，杯面有球朱古力雪糕，飲下食下啖雪糕都好正。朱古力心太軟配雪糕 $32朱古力蛋糕配上雲呢拿雪糕，冷熱交雜，作為飯後甜品非常滿足。