黑木亭-お食事処 (玉成大廈) (已結業)

收工約咗朋友食飯，諗住去食街搵嘢食，見到有間新開嘅餐廳就試吓啦，等咗大概5分鐘就可以入座。入去左邊corner有個打卡位，有啲日式擺設佈置、有棵櫻花一個屏風位，牆側邊仲有和風系清酒酒埕，不過咁啱我就坐牆嘅另一邊。我哋叫咗小食唐揚小池魚，一條條炸魚仔，好精緻脆口。第二樣係A5宮崎和牛舞茸野箘薄燒，好似金菇牛肉卷咁，不過入邊係好爽甜嘅舞茸野箘菇，平時出邊食開都係大概六件，呢度嘅份量比較多。主菜就叫咗鐵板活海鰻，石燒形式熱辣辣，佢嘅份量都大舊和厚切，入面都比較多細骨，點埋個醬汁好惹味！餐廳做緊清酒買一送一，不過我哋叫咗兩杯特飲，我叫咗比較清新嘅洛神花茶，鍾意佢淡淡地唔甜，朋友就叫咗蜜桃烏龍茶，上面有隻用冰整嘅熊仔，好可愛啊！我試飲過就覺得比較甜，鍾意甜嘅朋友可以點嚟試吓。整體環境不錯，唔會好嘈，職員好有禮貌，女職員仲着住日式和服上衣，上菜速度係你食完一碟咁上下就嚟第二碟，啲嘢唔會凍晒，幾好！