渡船角海鹽燒 (已結業)

呢晚突然好想食串燒，於是就搵吓附近有無啦，咁啱又俾我見到有間串燒店，於是我就決定去試試。睇到門口個牌寫住招牌廣島蠔湯，又見到隔離飲緊喎，我諗一定係必叫嘅，所以叫咗個試吓，個湯嚟到熱辣辣，湯裡面有隻肥美嘅廣島蠔，果然係招牌，好鮮美。鹽蔥燒茄子燒火候剛剛好，唔會燒到好燶，仲好細心咁切開一件件，方便食用。宮古豚肉燒完仲有好多肉汁，雞腎就好爽脆。沖繩Agu豚肉荔枝卷食到油香，加上荔枝嘅酸甜，中和咁豚肉嘅肥膩感，好味! 燒韮菜都好香，但又唔會太乾。燒蠔可選雙併，我揀咗鹽燒同蒜蓉兩款口味，鹽燒食到厚岸蠔本身嘅鮮味，蒜蓉口味就比較惹味，帶出蠔味，正! 燒菠蘿一向都係我最愛，所以去親食燒烤，都會叫。香汁燒白鱔外皮香脆，肉質係爽爽哋嗰種，唔錯!食食吓愈嚟愈多人，好彩早一步過嚟食晚飯，避開人潮。