龍津串燒 (已結業)

深水埗都有幾多串燒檔，但呢間坐得係最舒服，冷氣位有7、8張檯，室外位置都好寬闊，唔似其他舖咁差兩步就係車路。至於食物方面都有驚喜，d蠔肥嘟嘟好鮮好甜，咁大隻之前係$100/3隻，而家做埋優惠$20一隻，勁抵食之餘燒蠔方式都有兩款，一款係蒜蓉燒，蒜蓉味夠香而不過咸，另一款叫泰式汁，呢個簡直食上癮，個汁香、辣、咸、酸、甜恰到好處，同個女仔傾偈得知真係泰國人主理，無諗到呢間舖咁中式都會專登搵個泰國人專門做呢個泰式汁。要俾十隻手指公佢。我哋仲食左：燒鱔：鱔本身好彈牙，加埋蜜汁包住鱔食落夠juicy。粟米粒串：香甜，女仔最鍾意，因為食落方便，唔會好輪盡，真係心機之作。燒賣：師傅燒得真心好，外脆內軟，唔似其他燒到成粒乾哂。仲有食左一夜乾雞翼，燒白鯧仔，台灣腸，錫紙花甲粉絲，大頭蝦，馬友，黃花，原條茄子都燒得美味。因為有朋友唔食得太辣都無所謂，佢哋檯面都放定兩樽辣椒粉同孜然粉，好細心。特別一提有款小食叫捧捧魚乾比起雞泡魚干香d同埋軟身d，出面亦都唔見有呢款魚干。我哋食夠300蚊有張9折卡下次可以用，呢次嘅食之旅個個都好開心大滿足，一定會再嚟encore。